" سوشیانتی وڵاتی رۆژ "

جەعفەر کەریمی
2013-05-11

 

ڕێگوزەری هزر و ڕامانی شەهیدی کورد و کوردستان لە سەر شاباڵی مەلەکە تاووس بەرەو باوەشی کۆ ئاورینگی خواوەندی خولگەی زەوەی دەفڕێ و پەیامی پەیامهێنەرانی ڕزگاریخوازی وڵاتی کورد دەباتە گوێسوانەی ماڵی هەموو ئەستێرەیەکی ئاسمانی وڵات.ئەو ڕێیە هەزاران ساڵە ڕێچکەدارە، نە مەلەکە تاووس ماندویە و نە کاروانی شەهید وەستاوە .

سوشیانتی وڵاتی ڕۆژێ بە دندووکی سوور و سنگی سەوز و باڵی زەرد ئاسمان دەتەنێ و قەت ئۆقرە ناگرێ." نا" دەیڵێتەوە و"نایە" دەژەنێ، دۆڵ و چیا دەبڕێ و ڕستە ڕستە پەخشانی سەرکەوتن دەهۆنێتەوە و بار و بنەی سەربەخۆیی وڵاتی ڕۆژ لە سەر پشتی ئەسپی شێ خەزی خودای ڕاستان ڕادەژەنێ، سروودی ئەی شەهیدان وەکو ڕەمزی سەرکەوتن دەباتە دەرگای مەزنترین وڵات بە ناوی کوردستان. ئەو خاکەی کە ئەحمەدی خانی لەسەر دیواری " قەڵای دمدم " وێنەیەکی هەڵکەند و بۆ هەتاهەتای مێژوو منی لە خەوی بێ خەبەری ڕاچڵەکاند .

لەو وڵاتەی کە فارسەکان پێی دەڵێن " ئێران " لەکاتی خۆیدا لە بڵیندترین لوتکەی چیای " ئەلبورز " کەسێک بەناوی " ئارەشی کەمانگەر " تیرێکی هاویشتووە تا سنوری نێوان ئێران و تووران دیاری بکا، پاش هاویشتنی ئەو تیرە، گۆیا لەوێ گیانی لە دەست داوە و مردووە. ئارەشی کەمانگەر لەو کاتەوە بۆتە ئەفسانە، سومبول، قارەمانی نەتەوەیی بۆ ئازەری، کورد، بلووچ، تورکمەن، عەڕەب، فارس و هەموو ئایین و کەمیینەکانی دیکە. لەوەش بترازێ وەکی وانە دەرخواردی مناڵی کورد و ... دەدرێ لە فێرگەکاندا لەبەر دەستانە. (منیش بە ملی شکاوم بیست و پێنج ساڵ ئەو دەرسەم بە منداڵی بێ گوناحی کورد گوتەوە).

دەڵین قسە قسە دێنێ، ئەوە لە ئارەشی کەمانگەری فارسان. ئەو ئەفسانەیە چەندە وێ چووە چەندە درۆیە با مێژوو ناسان بڕیار بدەن. بەڵام مەبەستی من لە کورتە نوسینەدا ئەوەیە، خەڵکی بیانی لە کایەک کێوێک ساز دەکەن لەسەر حیسابی زمان و خاکی کورد خۆیان وەها دەوڵەمەند کردووە ئەو سەری نا دیار.

گوتیان حەیران سازبە ساڵڕۆژی شەهید بوونی " فەرزادی کەمانگەر و هاوڕێیانیەتی" بەپەلە خۆم حازر کر دو وەڕێ کەوتین، هەم دەگریام هەم سەرئەفراز بووم کە نەتەوەکەم خاوەنی دەریایەک شەهیدی قارەمانە بۆ دواڕۆژمان پێی سەر بڵیندین. پاش ماوەک گەیشتینە شوێنی مەڕاسیم. بۆ چەند چرکە چاوم دەتگوت کوێرە و نابینم. دەورو بەری خۆم ڕوانی چم نەدیت؟ وامزانی جندرمەی تورک یان پاسدار هاتوون بۆیە خەڵک دەترسێ بەشدار بن. دەتگوت دێو جامەی لێیە هەموو زراومان تەقیوە. خاوەنی عەرز و ئاسمان ئەدی لە چوار شاری مەزنی ئەو وڵاتە تەنیا ٣٠ تا ٤٠ کەسی کورد لێیە؟ لەوانەش نزیکەی دە کەس کامێڕا بە دەست و ئاڵا بەدەست بوون .

بەخۆم گوت: هەستە ڕابە، فەرزاد کەمانگەر، شیرین گەمانگەر، عەلی کەمانگەر، فەرهاد کەمانگەر، تەواوی کەمانگەرەکانی وڵاتی ڕۆژێ، لەکوێن مێژوونووسی کورد هەتا بنووسن" ئەو کاتەی کە بە فەرزادیان گوت: داوای لێبوردن لە خامنەیی بکەی لە دارت نادەین؟ لە وڵامدا گوتی، داوا لە کێ بکەم، من کوردم بۆیە لە سێدارەم دەدەن، قەت ئەو کارە ناکەم " بۆ ساڵهاتی قارەمانی گەلەکەمان ئاوا بەشدار دەبین، بۆ شایی و لۆغان خۆ بادان شەرمانە و نۆرە بەکەس نادەین سەرچۆپیمان لە دەست بستێنێ. ڕووپەڕێکی دیکەی ئەو بارودۆخە خەتای دووژمن نییە، خاکمان لەت کرد، شەهیدمان لەت کرد، کێلو بەردی شەهیدانمان شکاند، سنگی دایکی شەهیدانمان هەنجن هەنجن کرد، یەک بووین، بووینە دوو... دوو بووین، بووینە چوار و شەش و... لە کەمپەکان هەڵتووتەکاوین و کارمان بۆتە دم پان کردنەوە، وێنە کێشان، دەست لە کورسی شکاو هەڵناگرین و هیچ پڕۆژەمان نییە بۆ چارەسەری.  دەوڵەتی ئیسڕاییل ٦٣ ساڵە دامەزراوە، بە ٢٢ وڵاتی عەڕەبی دەرەقەتی نایەن. حیزب هەیە، ٦٧ ساڵی تەمەنە،٦٧ وشەی کورد خۆزانەی لە جانتادا نییە.

لە هەر چوار بەشی وڵات دا تەنیا چوار کەسم بۆ ببینەوە یەک پەڕتوکی بە زمانی ئاکادێمی، زانستی سەردەمییانە، بە شێوەیەکی"ڕەخنەگرانە" لە سەر مێژووی کورد نووسیبێ؟ بۆ پێم ناڵێن؟ کە ڕەخنەشت گرت سەدان تانە و تەشەرت بۆ هەڵدەبەستن. دەروێشی وام پێ شک دێ نازانێ کوردی باش بنووسێ کەچی کەسی لە خۆی پێ کورد تر نییە. لە کۆتاییدا هەر ئەوندەم ماوە بیڵێم: هەر نەتەوەیەک رابوردوو نەکاتە ئەزموون بۆ دواڕۆژی، قەت سەر ناکەوێ.

 

ف/ تورکو

 جەعفەر کەریمی