ڕۆژی چوارشەممە ڕێکەوتی ٩/١٠/٢٠١٩ ‌ڕێژیمی داگیرکەری توركیا دوای کشانەوەی هێزەکانی ویلایەتە یەکگرتووەکانی ئەمریکا لە چەند ناوچەیەکی ڕۆژئاوای کوردستان، هێرشێکی داگیرکارانەی  نامرۆڤانەی لە زەوی و هەواوە  بە فەرمانی سەرۆکە فاشیستەکەی، واتە تەیب ئەردۆغان و بە هاوکاریی چەتە و تیرۆریستەکانی ئەلنوسرە و چەند گرووپێکی بەناو ئەرتەشی ئازادی سووریا بۆ سەر رۆژئاوای كوردستان دەست پێ کرد. بیانووی ئەرۆغان و ڕێژییمەی فاشیستەکەی بۆ ئەم هێرشە دڕندانەیە بوونی پ.ک.ک یە لە ڕۆژئاوا. لەکاتێکدا هەموو جیهان دەزانێت هۆکاری سەرەکیی ئەم هێرشە، دژایەتییکردن و لەناوبردنی هەموو پێگە و ستاتۆیەکی کوردییە بەتایبەت لە ڕۆژئاوای کوردستان. دیارە پێشتر ئەردۆغان دژایەتیی خۆی لە کاتی ڕێفراندۆمی باشووری کوردستانیش نەشاردەوە و ئەوەی پێی کرا بۆ شکستپێهێنانی سەربەخۆیی باشوور کردی. ئێستاش لە ڕێی ئەم هیرشەوە دەیهەوێت هەم ستاتۆی کورد لەم بەشەی کوردستان لەناو بەرێت و هەمیش بە نیشتەجێکردنی عەرەب و تورک لەم بەشەی کوردستان، دێموگرافیی ناوچەکە بگۆڕێت.

جێی خۆیەتی و ئەرکێکی نیشتیمانیی و مرۆڤانەیە کە هەموو ئازادیخوازانی جیهان و بەتایبەت گەلی ئازادییخواز و خۆڕاگری کوردستان لە هەموو بەشەکانی بە هەر شێوەیەک لەدەستیان دێت، پشتگیریی ڕۆژئاوای کوردستان بکەن و کوردانی تاراوگەنشینیش لە ڕێی ڕێپێوان و مانگرتن و خۆپێشاندان و نووسین و بە هەر شێوەیەک لەدەستیان دێت، بەتایبەت بە ئاگادارکردنەوەی کۆمەڵگەی جیهانی و ئازادییخوازانی جیهان پێش لەو داگیرکارییە بگرن و دەوڵەتی داگیرکەری تورکیا مەحکووم و ڕسوا بکەن.

بژی یەکگرتوویی و هاوخەباتیی گەلی کورد!

نەمان بۆ داگیرکەران و ناحەزانی کوردستان!

کۆمەڵەی یەکسانیی کوردستان

١٠/١٠/٢٠١٩