پیرۆزبایی کۆمەڵەی یەکسانیی کوردستان بە بۆنەی یەکگرتنەوەی هەردوو لایەنی حیزبی دێموکرات

کۆمەڵەی یەکسانی
20-11-2022

 

پیرۆزبایی کۆمەڵەی یەکسانیی کوردستان بە بۆنەی یەکگرتنەوەی هەردوو لایەنی حیزبی دێموکرات 

بەڕێز ئەندامانی بەڕێوەبەرایەتی حیزبی دێموکڕاتی کوردستان و حیزبی دێـموکڕاتی کوردستانی ئێران 

سڵاوێکی گەرم! 

کۆمەڵەی یەکسانیی کوردستان وێڕای دەستخۆشیی لە ئێوە و هەموو ئەو لایەن و کەسایەتییانەی کە ڕۆڵیان هەبوو لە پرۆسەی یەکگرتنەوەی دوو لایەنی حیزبی دێموکڕاتی کوردستانی ئێران و حیزبی دێموکڕاتی کوردستان،خۆشحاڵیی خۆمان بەو یەکگرتن و دەستکەوتە ڕادەگەینین و بە بۆنەی ئاشت بوونەوە و برێاری دریژەدان بە خەباتی هاوبەش لە ناو یەک ڕێکخستندا پیرۆزبایی لە هەموو ئەندامانی حیزبی دێموکرات و خەڵکی کوردستان دەکەین. هیوادارین ئەوە سەرەتای قۆناخێکی تازە و هەنگاوی گەورەتر و سەرکەوتنی زیاتری بە دواوە بێت لە ڕۆژهەڵاتی کوردستان. 

بەو هیوایە  ئەزموونێکی باش لە دابڕانەکانی ڕابردوو وەرگیرابێت و بە گشتی لە ڕوانگەیەکی خسارناسییەوە لە هۆکار و دەرئەنجامەکانی لێکدابرانەکانی پێشووی ناو بزوتنەوەی ڕزگاریخوازانەی کوردستان بکۆلدرێتەوە و ڕێکارێ نوێ و زانستیانە بۆ چارەسەریی کێشە ناوخۆییەکان بدۆزریتەوە تا لە داهاتوودا پێشهاتەی لەو جۆرە دووبارە نەبنەوە و خەون و ئاواتی داگیرکەران لە گۆڕ بنرێن. 

بژی ئاشتی، سەرکەوێ ڕەوتی ڕوو لە گەشەی خەباتی هاوبەش لە پێناو ڕزگاریی نیشتمان و پێکهێنانی کۆمەڵگەیەکی ئازاد و سەربەخۆ و یەکسان 

کۆمەڵەی یەکسانیی کوردستان 

٢٥/٨/٢٠٢ی زاینی 

٣ی خەرمانانی ٢٧٢٢ی کوردی