بەبۆنەی کارەساتی سووتانی قوتابخانەیەکی سەرەتایی شارۆچکەی شیناوێی پیرانشار و قوربانیی بوونی زیاتر لە ٣٠ مناڵی ئەم قوتابخانەیە، کۆمەڵێک لە چالاکوانانی مەدەنیی ڕۆژهەڵاتی کوردستان لە ڕاگەیاندنێکدا داوایان کردوە کە ڕۆژی پێنجشەممه ٢٣/٠٩/١٣٩١ی هەتاوی (١٣/١٢/٢٠١٢ی زایینی)‌ بکرێت بە رۆژی ماته‌مینی گشتی بۆ هاوخه‌میی له‌ گه‌ڵ بنه‌ماڵه‌ و که‌س و کاری ئه‌م مناڵانە و بۆ ئەم مەبەستەش داوا کراوە کە ڕۆژی پێنجشەممە لەسەر گۆرستانی شیناوێی پیرانشار لە کۆبوونەوەیەکی جەماوەرییدا هاوخەمیی خۆیان دەرببڕن.

 

ئێمە وەک کۆمەڵەی یەکسانیی کوردستان، وێڕای هاوخەمیی و سەرەخۆشی لە کەسوکاری ئەو مناڵانەی بەهۆی ئەم ڕووداوە دڵتەزێنەوە گیانیان لەدەست داوە و هیوای چاکبوونەوە بۆ مناڵەکانی تر کە بوونە قوربانیی کەمتەرخەمیی بەرپرسان و سیستەمی هەڵاواردنی کۆماری ئیسلامی، پشتگیریی خۆمان لەم هەنگاوە بەجێیەی چالاکوانانی مەدەنیی کوردستان دەردەبڕین و داواکارین هەموو ئازادیخوازان و دڵسۆزانی گەلەکەمان پشتگیری لەم بانگەوازە بکەن.

 

با هەموومان بە ئامادەبوون لەم کۆبوونەوەیەدا، وێڕای یەکدەنگیی نەتەوەیی و هەڵبڕینی دەنگی ناڕەزایەتی لە دژی هەڵاواردنی سیستماتیکی کۆماری ئیسلامی، دڵسۆزیی و هاوخەمییمان لەگەڵ قوربانیانی ئەم کارەساتە دەرببڕین.

 

کۆمەڵەی یەکسانیی کوردستان

 

٢١/٠٩/١٣٩١ی هەتاوی

 

١١/١٢/٢٠١٢ی زایینی