حکومەتی تورکیای داگیرکەر ئێستا لە چەند لاوە لە ناوخۆی وڵات و لە گۆڕەپانی جیهانیش لەژێر گوشاری سەختی ئابوری و سیاسی دایه و ئەردۆغان چ لە گوڕەپانی سیاسەتی ناوچەیی و ناونەتەوەییدا و چ لە گۆڕەپانی سیاسی و ئابوریی ناوخۆدا بەسەختی خەریکی دۆڕاندنە و لە کۆتایی خۆی نزیک دەبێتەوە. بەدڵنیاییەوە تورکیا و باکوری کوردستان خەریکی ئاڵوگۆڕێکی گەورەیه

خەڵکی کوردستان لە ڕێوڕەسمە نەورۆزییەکانی ڕۆژانی ڕابردوودا کە زۆر شکۆمەندانە لە سەرتاسەری ڕۆژهەڵاتی کوردستان بەڕێوە چوون نیشانی دا، کە چەندە وشیارانە و یەکگرتووانە بۆ گەیشتن بە ئامانجەکانی شۆڕش تێدەکۆشن. نیشانیان دا کە ئەگەر خەڵکی ئێران لەگەڵیان بێنە گۆڕەپانی شۆڕشەوە، کوردستان لە توانای دایە لە ماوەیەکی کورتدا داگیرکەر وەدەر بنێت و چارەنووسی سیاسیی خۆی بەدەستەوە بگرن.

جەژنی نەورۆز هێمای زیندووبوونەوە و ئاگریش هێمای دەسەڵاتە. ڕۆژێک بەم زوانە ئاگر دەگەڕێتەوە لای خەڵک و دەسەڵات دەکەوێتەوە دەستی خەڵک. ئیتر ئەم ڕۆژە ڕۆژی ژیانەوەی نەتەوە و گەیشتن بە ئازادی و یەکسانییە.

ئێمە دڵنیاین کە خەڵکی ڕۆژهەڵاتی کوردستان لە ١١ی ڕەشەمەدا بە بایکۆتکردنی یەکپارچەی شانۆی هەڵبژاردنی کۆماری ئیسلامیی، "نا"یەکی دلێرانە و شۆڕشگێرانەی تر بە گوێی کۆماری سێدارەدا دەدەن و لاپەڕەیەکی زێڕینی تر لە مێژووی پڕ لە شانازیی کوردستانی شۆڕشگێردا تۆمار دەکەن!

زمان ڕێگەی ناسینەوەی جیهانی دەوروبەر و کانگای پەروەردە کرنی بیر و هزرە. زمانی کوردی هەموو بیر و هزر و ناسنامەی کوردە و مەترسی بۆ سەر زمان مەترسی بۆ هەموو جەستەی فەرهەنگییمانە. ڕۆژی جیهانیی زمانی دایکیی بەهانەیەکە بۆ ئاوڕدانەوەیەکی جیددی بۆ سەر ئەو مەترسییە گەورەیەی کە لەم پەنایەدا سەنگەری گرتووە و چاوەڕوانی هەلێکە بۆ خنکاندنی دەنگی نەتەوەیی گەلێک کە لە زمانەکەیدا هەروا زیندووە

کۆماری سێدارە تەنها لە مانگی ژانویەی ٢٠٢٤ دا ٧٤ کەسی بە پاساوی جۆراوجۆر لە سێدارە داوە کە لەوانە ٣٤ کەسیان کورد بوون. کۆماری سێدارە و بەردەباران و شەللاق و قەساس و ترۆر، تەنها لە ژانویەی ئەمساڵدا زیاتر لە ٥٠ کۆڵبەری لە ناوچە سنوورییەکانی کوردستان بە تەقەی ڕاستەوخۆ کوشتووە و بریندار کردووە.

ئێوە ئەمڕۆ بە مانگرتنی یەکپارچە و سەرتاسەرییتان بۆ جارێکی تر بە دۆست و دوژمنتان نیشان دا کە کوردستان قەڵای لەگیراننەهاتووی شۆڕشە و بنەماڵە و کەسوکاری ئەو ئازیزانەتان بەتەنها جێ نەهێشت کە ڕۆژی ڕابردوو بە دەستی جەللادانی کۆماری ئیسلامیی لەدار دران. ئێوە بەم مانگرتنە پانوبەرین و شکۆدارەتان کە تەواوی ڕۆژهەڵاتی کوردستانی گرتەوە، بەردەوامیی شۆڕشی ژیناتان بۆ جارێکی تر پشتڕاستکردەوە و داگیرکەری کوردستانتان لەوەی کە هەیە ڕیسوا و ڕیسواتر کرد.

ئێمە پشتیوانیی خۆمان بۆ داوای ڕێکخراوە شارستانییەکان و هەروەها بۆ داوای بنەماڵەکانی ئەم چوار زیندانییە سیاسییەی بە دەستی ڕێژیمی فاشیستی ئیسلامی لەسێدارە دران، بۆ مانگرتن و دەربڕینی ناڕەزایەتیی گشتیی لە ڕۆژی سێشەممە، دەی ڕێبەندان دژی کۆماری سێداری ئیسلامی ڕادەگەیەنین و داواکارین خەڵکی کوردستان بە هەر شێوەیەک بۆیان دەکرێت لەم ناڕەزایەتییەدا بەشدار بن.

کۆماری کوردستان بە تۆمارکردنی مێژووێکی پڕشنگدار، پڕدەسکەوت و ئەزموونێکی بەنرخ، بووە هەوێنی گەشەسەندنی خەباتی ڕزگارییخوازیی گەلی کورد بۆ ڕزگاریی لە ژێرچەپۆکەیی نەتەوایەتیی. ئەو چرایەی کە لە چوارچرا هەڵکرا و دوژمن هەوڵی دا بیکوژێنێتەوە، بووە چلچرای ئومێدی ڕزگاریی و سەرکەوتن و لە هەموو بەشەکانی کوردستان دەدرەوشێتەوە.

کۆمەڵەی یەکسانیی کوردستان وێڕای دەربڕینی هاوخەمیی خۆی لەگەڵ کەسوکاری گیانبەختکردوانی هێرشەکانی شەوی ڕابردوو، هێرشی کۆماری ئیسلامیی بۆ سەر شاری هەولێر و هاژەکبارانی خەڵکی سیڤیل و دەستپێکردنەوەی بۆردومانەکانی تورکیەی فاشیست بۆ سەر ڕۆژئاوای کوردستان بەتوندی شەرمەزار دەکات و داوا لە کۆمەڵگەی نێودەوڵەتیی دەکات سنوورێک بۆ کردەوە فاشیستییەکانی دوژمنانی کوردستان دابنێن.

کۆمەڵەی یەکسانیی کوردستان هێرشی هۆڤانە و ترۆریستیی بزووتنەوەی حەماسی گوێلەمستی کۆماری سێدارە بۆ سەر خەڵکی سیڤیلی ئیسرائیل و کوشتاری بە کۆمەڵی خەڵکی سیڤیلی غەزە و فەلەستین لەلایەن حکوومەتی دەستە ڕاستیی ناتانیاهۆ وهێرشی خوێناویی ئەردۆغانی فاشیست بۆ سەر ڕۆژئاوا و باشووری کوردستان بە توندی شەرمەزار دەکات

کۆمەڵانی خەڵکی کوردستان، دانیشتوانی شارەکانی سەقز و سنە!ئیبراهیم ڕەئیسیی سەرۆکی کۆمیتەی مەرگی سەردەمی خاڵخاڵیی و سەرۆکی کۆماری مەرگ و سێدارە بڕیارە پێنجەشەممە ١١ی خەزەڵوەری ١٤٠٢ی هەتاوی (٢ی نۆڤامبری ٢٠٢٣) بگاتە شاری سنەی شۆڕش و ١٢ی خەزەڵوەریش پێی پیسی بنێتە سەر خاکی سەقزی پێشەنگی شۆڕشی ژینا و ژیان و ئازادی.

کۆماری ئیسلامیی و دامودەزگای مێدیایی ئەم ڕێژیمە هیچ کات و لە هیچ ئاستێکدا لە کوردستان جێی متمانەی خەڵک نەبووە. کەس نیە لە کوردستان نەزانێت، کە کۆماری ئیسلامیی بە سەناریۆسازیی و بە موهەندیسیکردنی هەواڵی گیانبەختکردنی ژنان و چالاکانی شۆڕش هەوڵ دەدات تەمەنی خۆی درێژ بکاتەوە و بەر بە کڵپەسەندنی شۆڕشی ژینا و ئارمیتاکان بگرێت.

کۆمەڵەی یەکسانیی کوردستان وێڕای شەرمەزارکردنی ئەم هێرشە نامرۆڤانەیە داوا لە کۆمەڵگەی نێودەوڵەتیی و لایەنگرانی ئاشتیی و مافی مرۆڤ دەکات لە هەنبەر ئەم تاوانکارییانەی ڕژێمی فاشیستیی تورکیە بێدەنگ نەبن و بۆ ڕاگرتنی هەرچی زووتری ئەم هێرشە کۆکوژییە خوێناوییانە لە هیچ هەوڵێک درێغی نەکەن.

دۆخەکە زۆر دژوارە و یەکێتیی و هاوهەنگاویی لێمان دەوێت! پێویستە لەم هەڵمەتەدا هەموو دەستمان لە دەستی یەکدا بێ و بە هاوکاریی خەڵکانی هومانیستی ئەو وڵاتانەی لێی دەژین پاڵپشتێک بین بۆ پێشمەرگەکانی ڕۆژهەڵات و بەتایبەتی بۆ خانەوادەکانیان و پەنابەرانی سیاسیی دانیشتووی باشووری کوردستان.

ئێمە وەک کۆمەڵەی یەکسانیی کوردستان سەرکەوتنی مانگرتنی گشتیی و ناڕەزایەتیی یەکگگرتووانەی خەڵکی کوردستان لە ٢٥ی خەرمانان، یەکەم ساڵڕۆژی گیانبەختکردنی ژینا و شۆڕشی ژن، ژیان، ئازادیدا بەرز دەنرخێنێن و وێڕای دەستخۆشیی و ماندوونەبوونیی و پیرۆزبایی لەهەموو بەشداربووانی ئەم هاودەنگیی و خەباتە شارستانییە، ئاواتەخوازیین ئەم شۆڕشە بە گوڕ و تینێکی زیاترەوە بەردەوام بێت و پەیامێکی بەهێزیش بێت بۆ یەکگرتوویی زیاتر و پێکهێنانی بەرەیەکی بەریینی ڕۆژهەڵاتی کوردستان.

٢٥ی خەرمانان، ساڵیادی کوشتنی ژینای ئازیزمان بەدەستی پۆلیسی بێڕەوشتی کۆماری سێدارە، ساڵیادی سەرهەڵدانی شۆڕشی ژن ـ ژیان ـ ئازادی لە ڕێمانە. ساڵیادێک کە ئەم ڕۆژانە هەم بەرەی خەڵک و هەم بەرەی دوژمنیش لە خۆئامادەکردندان بۆی. خەڵک بۆ هەرچی زیاتر بەرەوپێشبردنی شۆڕشەکە و دوژمنیش بۆ سەرکوتکردنی.

ئەمڕۆ ٤٤ ساڵ بەسەر کوشتاری بەکۆمەڵی خەڵکی سێڤیلی گوندەکانی قاڕنێ و قەڵاتانی شاری نەغەدە لە لایەن سپای پاسدارانی کۆماری ئیسلامییەوە تێدەپەڕێ. لە ڕۆژی ١١ی خەرمانانی ساڵی ١٣٥٨ی هەتاوی، (٢ی سێپتامبری ١٩٧٩) سوپای پاسدارانی کۆماری ئیسلامیی بە سەرکردایەتیی مەلا حەسەنی، هێرشێکی هۆڤانەی کردە سەر گوندی قاڕنێ لە ٥ کیلۆمیتریی شاری نەغەدە و هەر کەس لە دانیشتووانی ئەم گوندەیان بەردەست کەوت، لە منداڵەوە تا بەساڵاچووان و تەنانەت مەلای گوندەکەش کە بۆ تکا و پاراستنی خەڵکەکە چووبووە پێشوازیی پاسداران، کوشتیان.

دوای سەرکەوتنی شۆڕشی ١٣٥٧ و لەگۆڕنانی ڕژیمی حەمە ڕەزا شا، ڕۆژهەڵاتی کوردستان بۆ چەن مانگێک دوور بوو لە ژێردەستەیی داگیرکەران و ئازادی و دێموکراسیی باڵی کێشابوو بەسەر ئەم بەشەی وڵاتەکەماندا.

مامۆستا سەید ڕەشید حوسەینی یەکێک لە دامەزرێنەرانی کۆمەڵەی یەکسانیی کوردستان و یەکەمین سکرتێری یەکسانیی بوو. مامۆستا هۆزانوان و ئەدیبێکی یەکسانییخوازی توانا و پێشەنگێکی دووربین و لێبڕاو و ماندوویینەناسی ڕێبازێکی سیاسیی بوو، کە ئامانجی ڕزگایی کرێکاران و هەژارانە لە ستەمی چینایەتیی و ڕزگاریی ژنانە لە هەڵاواردن و ئاپارتایدی ڕەگەزیی و ڕزگاریی وشەیە لە کۆتوبەندی دیکتاتۆریی و ڕزگاری هەموو گەلی کوردە لە ژێرچەپۆکەیی داگیرکەران و ڕزگاری مرۆڤە لە چەوسانەوەی بە دەستی مرۆڤ.